「港識多史」呢個歷史page 本身算做得唔錯，但唔知係咪想搏流量，結果被一眾老鬼級巴膠左一巴右一巴直指呢忽錯嗰句錯，然後重新嚟過，但結果都係要繼續錯。以為閂咗留言功能就無事，仲要偷 HK BUS CHANNEL 獲授權嘅相 (又唔嚟搵我哋做功課)，咁就只好同你搞大件事囉
首先，佢講乜嘢「後置引擎吹唔到風所以唔適合香港」
喂阿哥，家陣成街專利嘅 ADL、Volvo，仲有旅遊巴嘅 Scania、Benz、FTBCI、宇通 bla bla bla 全部後置引擎，乜嘢嚟㗎?!
根本後置引擎 vs 前置引擎嘅散熱响1960/70年代嚟講係一個有少少複雜嘅工程學問題 ~ 唔係副引擎擺前面定後面嘅問題，係整個引擎冷卻系統設計嘅問題
第二，佢話「勝利二型選用吉拿引擎所以夠力爬山」
DLGH，佢成條片其中一個主軸嘅「珍寶」都係吉拿引擎，或是我前兩個 post 貼嘅嗰款 CVG6 都係吉拿引擎嚟㗎！
姑且「塞錢入佢袋」勝利二型之所以爬山了得嘅其中一個因素係選用俗稱「行星齒輪」，正式名稱叫 Hub reduction gear 嘅尾擔，再計埋對行外人有少少複雜嘅「齒輪比力學」而成。
但又其實對比返 Dennis Jubliant 只係「普通尾擔」 Single reduction，勝利二型選用嘅尾擔只不過對 both 九巴及中巴嚟講都係完全新鮮嘅事物，先至成為「賣點」
第三，佢話「勝利二型因為波箱嘅聲音所以被稱為『雞』」
恕坦白，我未聽過呢個講法，問咗幾個比我更熟呢段歷史嘅人，佢哋都無話有聽過呢個講法。即係可以斷定係9UP之老作。
最多嘅講法係源於九巴嘅 G1-G4 「佳牌」又地台離地高於是被叫做「高腳雞」開始
後續講其他佢講嘅巴士車款之前，對勝利二型再補充多少少。
勝利二型嘅出現表面上確係因為「珍寶」响香港出現比英國更多嘅問題。但之前响我呢度同 HK Bus Channel 都有再詳細少少指出，要不是 Dennis 整 N1-N4 俾九巴而用咗唔夠半年就找數兼「加單」，Leyland 車廠係「睬香港都傻」。呢啲歷史嘅枝節，佢哋有搵我哋或其他「老鬼巴膠」討教的話，根本係唔會無咗！
繼續第四，佢話「三軸巴士源於勝利二型容易反車」
可能要直接講「你以為自己係則卷小雲 ~ 創作力量同幻想會嚇你一跳」呀?!
三軸巴士响香港嘅出現，其中一個主因係前年辭世、於1977年由英國來港加入運輸署嘅 John Shearman 推動所致。理論上就算要「賴」勝利二型都係好，John 嘅主要出發點係在於載客量。
第五，針對佢講 DMS 同二手巴士，淨係「中巴改散熱網」，响我認識住港島嘅老鬼巴膠已經冚把冷「DKLM！講乜春呀?!」
「London Transport 做咗設定 2 波起步」呢個簡直謬論。
嚴格講，不論選用嘅波箱係 SCG 出品還是丹拿自家嘅 Daimatic，只係加咗一組「自動轉波」裝置，而根本唔係自動波。更何況已經幾路 double checked 不論 SCG 或 Daimatic 都只能設定1波起步。
第六，比較學術啲講，佢命題「有無被搵笨」根本係偽命題。事關一來香港當年要買二手巴士係一個「為勢所迫」，當中巴用 MCW Metrobus 客觀上可算是「只係摸住石頭過河」，並觀望緊 Leyland Olympian 同 Dennis Dominator 响英國嘅使用情況未敢貿然買新車，見 Ensign 有一批倫敦運輸局認為係「工業垃圾」嘅嘢就姑且平平哋頂住先。
二來，香港買二手巴士要追溯到1972-73年，石油危機形成嘅經濟環境，「珍寶」嘅價錢簡直天價，中巴九巴想慳錢，適逢英國多地有堆大約十年車齡嘅 Leyland PD3 (主要中巴)、AEC Regent V 同 Daimler「牛仔」(九巴) 想放售。
就算要真係話「被搵笨七」，極其量算到 Atlantean PDR，都未輪到 DMS 啦
第七，DP1932 嘅冷氣係用獨立引擎!!!! 呢個錯到簡直「罪無可恕！人嚟，推出午門眨首示眾」嘅級數
至於偷相，雖然係一張，但偷就係偷。我問咗巴士台其他 admin，無人有收過佢哋 PM 問要用相。
睇返條片嘅畫面，佢好明顯CUT咗右上角「巴士台」嘅台徽同左下角 Credit: Mr Richard Cripps 嘅水印。
呢張相，或 Richard Cripps 呢批相嘅授權，係我親自同呢位1982年來港嘅外籍朋友 deal 嘅。雖然佢本身對於 copyright 無太大執著，但唔代表可以任意妄為。因此都加上水印以阻止偷相。估唔到堂堂「歷史研究者」連咁基本嘅知識產權尊重都無！
由於我哋唔係最終 Copyright 持有人 (只係獲授權人)，未能正式向 YouTube 提出申訴。但唔代表港識多士係無問題。
所以，唔該港識多史最好刪除影片，同埋唔好再造第三次。一日唔搵啲老鬼做功課，一日都會錯。但呢一條片辣著晒大量老鬼巴膠，相信係唔會有人願意同佢哋做功課。
後記：，可能大家想問，點解我以至巴士台唔出片講吓呢啲歷史?
一來我哋唔太鍾意呢啲「執藥式」製作 – 求其到畫面同 VO 完全無關連。e.g. 講緊後置引擎巴士但畫面全部係「牛仔」- Damiler CVG 或「紅蕃頭」Guy Arab
二來，亦係最主要嘅原因，要稍為認真「執藥」需要嘅就係時間。時間都係 cost。當「呃咗捷輝小巴謝生逾四十萬港元匿藏德國Düsseldorf (定英國 Poole??) 嘅黃世澤」另外仲走咗我逾二十萬港元本係用作營運巴士台嘅資金嘅時候，邊度有時間去整?!
Be the first to comment