週前提到運輸署為求強力執行預計1月25日實施嘅搭巴士帶安全帶法例，一如過往 (當有利自己時就) 援引其他地方例子，其中一個係新加坡。
入正題之前簡單講點解新加坡呢個例子「打到咁重手」，原因唔係我熟悉新加坡，而係中国香港特別行政区第一任特首董建華 曾講過一句名言：香港應該好好「向新加坡學習」。運輸署好似遵行董伯伯訓示，但又偏偏學錯晒，我咪一於打佢滷帽臭揩仆佳杏加橙囉。
運輸署引用嘅例子仲有好多，其中一個係深圳，但香港人依家對深圳咁熟悉，我唔浪費時間。另一個「內地」嘅例子，就係上海。
我對上一次去上海已經超過20年前，呢世人都唔會再去。點解？可知道上海人同坡縣人一樣好睇唔起香港?! 總之對上海係毫無好感。只不過….
唔好意思，咁啱有朋友去上海公幹返嚟香港，吹開水講開呢件事。佢話「去咗上海咁多次，除咗的士都偶爾會搭下巴士，但真係無見到啲巴士有安全帶」
我話「運輸署話有喎」
朋友回答「啲長途巴就有」「你以前好鍾意嗰啲富豪B10M、SETRA 嗰啲就有」
只不過，朋友唔習慣响街上、巴士隨意影相，所以佢無影到相俾我。但 Internet 有樣嘢叫搜尋網站，搵到應該舊年6月，算係最新開辦巴士路線嘅新車落地嘅相片，算係有圖有真相
七蚊兩個錶，安全帶响邊呀喂？
根據中华人民共和国GB 7258-2017 第 12.1.1 條：
「**未設置站立區的公共汽車**均應裝置汽車安全帶。」
意即 **「設有乘客站立區」（即有企位）的城市公共汽車（公交車），在法律上豁免** 強制安裝乘客安全帶的要求
另外，根據 GB 13094-2017《客車結構安全要求》：
第 I 級客車：准許乘客站立，並設有足夠的站立面積及乘客扶手。
「內地」有汽车專家解讀：因第I級客車其運行速度較低、停站頻繁且空間結構特殊，其安全性主要依靠扶手、護欄和車內佈置來保障，而非安全帶。
即係話，運輸署「講大話」再一次斷正，或講得好聽啲，錯誤援引例子。
另外，如今中央政府要求中国香港特区貫徹落實全面回歸，得與「內地」同步，運輸署豈不是干犯「分裂国家罪」嘅罪行嗎？
一係咁，要體現與「內地」同步仲有一個方法，就係立即刊憲修訂 CAP. 374A，廢除第74條「站立的乘客」(修訂附屬法例條文係唔駛上立法會，頂多係進行「先訂立後審議」嘅程序)，令九巴、城巴、新大嶼山巴士嘅企位馬上消失，咁就GOOD FIT 晒喇。全部無得再唱張國榮嘅《Stand up》喇！
最後講多兩個故仔：
1. 當年 19vs20，即係小巴加座位嘅嗰陣，時任運輸署署長楊何蓓茵話「業界普遍使用嘅車款最多只能夠裝19個座位」；當裝到20座位嘅三菱ROSA 透明嗎? 事有湊巧，中国廈門嘅「金旅客車」又咁啱造好咗一部 DEMO 車嚟香港，又咁蹺地係裝設咗20座位。正所謂 愛祖国用国貨，運輸署咁都堅持19座，難怪 豐田霸權 呢四個字如今街知巷聞，甚至認定運輸署同皇冠車行有不法勾當之嫌；
(開口牌：今次擺明照版煮碗。仲有，等傳返上去小紅書，睇吓經常嚟香港快閃遊會搭巴士嘅大灣區民眾會有乜嘢反應)
2. 呢啲「抄啲唔抄啲」嘅誤導公眾唔係第一次發生。當年「停車熄匙」立法過程中，時任環境局局長邱騰華話立法係參考加拿大嘅做法。但後來被踢爆「抄漏咗」特殊天氣豁免條款，跟住先至跪低加返酷熱天氣警告等嘅「豁免」條文。
(有份指出嘅黃世澤咪撚話「抄你書」。依家只係闡述事件經過，而且呢啲嘢如今全部都係「公海嘢」。你咪唔記得口罩騙案係邊個救你！)
Be the first to comment