唔劇透影評《壞蛋獎門人4》深入寶山空手而回

相信無乜邊個會估到我竟然會去睇呢套卡通。作為 Minions 迷，梗係去搶頭啖湯，仲要今集香港係全球最早上畫嘅地方 (美國、歐洲、澳洲 7月3日先至上畫)，可以話我係去睇全世界第一場。

先此聲明絕不劇透，但先可以講，Illumination 擺上網嘅預告片，基本上係會知道又係大放笑彈嗰種；而如果有睇晒之前 Despicable me 1-3 加埋 Minions、Minions 2 The Rise of Gru 的話，雖然都會估到啲橋段有少少「炒冷飯」，但都會有期待上畫之日。

其中一個期待就係預告片提及嘅 Mega Minions 嘅戲碼，因為回望返之前咁多集，都會估「應該呢五隻嘢會施展渾身解數」。另一個期待就係 Gru 同 Lucy 嘅愛情結晶品嘅 BB 會有乜搗蛋嘢。

不過咁，前幾日睇返之前幾集响外國 (主要係美國) 啲影評，有提到 Minions 2 The Rise of Gru 並非由 Pierre Coffin 執導而總係好似爭咁啲，以至話虎頭蛇尾得好緊要，更有一篇「直線抽擊」not directed by Pierre Coffin could be a fault。而事實上 Minions 2 The Rise of Gru 唔少劇情「到喉唔到肺」，尤其是同 Despicable me 3 近尾段以為係元華做武指 (兼順便被畫師抄造型)「港產武打片」場面，或是啲 Minions 嘅「搗亂」同越獄後「柒事變立大功」去比較，真係會認同啲影評。

話咗唔劇透，當然唔會講今次呢集會係點，但就會講「唔係 Pierre Coffin 執導」嘅問題响今集似乎更加之嚴重。如果純粹諗住笑90分鐘的話，都應該會收貨嘅。

再又不過咁，今集嘅 ending 我會認為預視「玩」咗十年嘅 minions 有可能正式大結局。即係點？自己買飛入戲院睇就會明白。不過咁，想唔想睇請自行決定。