先此聲明，本文保證辣㷫全香港人，唔想睇嘅千祈唔好睇。仲有，唔好又要睇又要屌。記住你屌嘅唔係我，係屌車公！
2026年丙午馬年大年初二，鄉議局繼續派劉業強人到沙田車公廟為香港求韱問卦未來一年運程，結果求得第22簽；另外沙田鄉事委員會為沙田求得83韱。在未拋書包班門弄斧之前，先同鄉議局劉業強講句：「曲解韱文，小心招天譴，台灣老K主席鄭麗文有版你睇」。
先此聲明，小弟並無學過乜嘢玄學，多年前曾欲拜師但師傅向我講明 「你唔可以學，學咗你會走火入魔；但你有慧根，有時間就當幫吓人同自己積吓福」 。另外，同過一位師傅閒聊，佢提過車公韱文並沒有如黃大仙韱文有典故，相對地比較難解說，但車公在世時為將領，對君臣忠心之餘更關懷社稷，故會淺白的教誨信眾，因而亦可憑字面去思考參透。總之信則信，唔信撚就。
先講劉二世為香港求得嘅第22簽。簽文如是說：
刻木之夫不可親，當於善惡上觀人
但凡見利莫忘義，須向仁中慮不仁
有高人認為解呢條簽會惹官非，的確係有咁嘅可能。但我認為以車公之智慧同德道，佢唔會咁樣跣人。有人引用廿四孝之 「丁蘭刻木」 作為頭兩句嘅典故背景，我認為未尚不可，但只算是 「加強深度」 而已。誠如前段提及有師傅所分享的睇法，未必需要咁複雜。
只不過，睇 「斷曰」，訊息似乎非常清楚：
演技出色．虛情假意．佛口蛇心．找死無異．
有講法引用 「搭巴士帶安全帶」 鬧劇作例，完全同意。只不過若以劉二世 「為香港求簽」 的意向，呢支簽唔止對住有權有勢可以隨時拉你鎖你嘅權貴，仲包括全香港人。無錯，包括你同我。
好簡單，於當前有如 「誰大誰惡誰正確」 嘅社會氛圍之下，請問香港人採取嘅態度係乜？梗係 「西瓜靠大邊，跟紅頂白吖嘛」。「據理力爭」？你都憨撚柒鳩嘅，道理？值幾多錢呀
跟住，所謂 「善惡上觀人」 ，連埋 「斷曰」 去解，即係唔好睇人表面，要睇清楚嗰條友做嘅係啲乜。但家陣嘅香港人，網上嘅十居其九都係黃洋達上身 「有乜梗係屌咗先」，網下就一味 「先敬羅衣後敬人」；呼應返 「刻木之夫」 又係去返 「跟風向」 嘅做人態度。人哋做過乜有無記得吖？人哋做緊乜有無用吓個腦諗清楚係咪 「虛情假意」 吖? 乜都只係睇表面嗰層，梗係死撚得啦！
點解香港人會係咁？簽文第三句咪就係車公直線屌你啲港燦老母囉！家陣嘅香港人，有邊個唔係 「見利忘義」 呀。就算有，都成日俾啲 「跟紅頂白」 嘅粉腸恥笑 「正一憨鳩仔！ 」 或是群起而攻之。至於 「仁」 所指的是乜嘢？例如啲港燦曼聯球迷响舊年暑假英超轉會窗期間，對於賓福特講明 Bryan Mbuemo 目標價 6500萬鎊，對我呢個算係長期昅住賓福特呢隊波而話 「值呢個價」 就發爛咋甚至屌我老母。若有 「仁中慮不仁」 而唔係只會跟風向的話，點會有呢個場面發生呀??!
以前仲有人對選舉做評論時會有一個分析 ─ 有乜嘢選民就會有乜嘢嘅當選人。引伸至今，與其借簽文指向官場中人，不如疴篤尿照吓自己係一個乜嘢人而成就咗一個咁嘅社會狀態啦。要直接少少？「買贖罪券」 係無用㗎。若嫌唔到肉就直接啲：諗返吓呢十幾年嚟對個社會做過啲乜啦。就連年宵攤檔淘寶入貨都只會話 「買個開心咪得囉」，唔會諗返吓以前嘅年宵攤檔經營者點都會花啲心思，一味只會睇眼前，只會 「利字當頭」，係咪中咗簽文嘅第三同第四句呀?!
跟住講沙田嘅第 83 簽。簽文如是說：
掛帆順水上揚州，半途頗耐浪打頭
實力撐持難寸進，划槳下帆舟難走
呢支簽直情無典故可尋，故真係 「睇字面」 解就得。但都要睇埋 「斷曰」：
先順後逆．已盡人事．天命難違．忍耐莫怨．
首先，揚州於古時乃繁盛之地，以之類比沙田，可見車公之直接了當。
沙田此區於普遍港人嘅印象可謂 「典型中產區」。雖然 「中產」 算係一個人人追逐嘅 「人生目標」，但到如今，縱未至於人人喊打，但都走唔甩予人 「不可一世」 嘅觀感印象，再引伸出嚟就係 「自私自利」。
例如第一城鎖車隊 ─ 以 「維持屋苑內的道路秩序」 之名，敲詐勒索司機車主為實。即使面對輿論壓力，鎖車隊只圖變本加勵，更是起碼延伸至乙明邨，該就是簽文第二句之 「半途頗耐浪打頭」，以為繼續 「誰大誰惡誰正確」 之態度就可以繼續扮公義撈著數。
至於第三句，簡單嚟講就係 「死撐」 二字。即一邊廂疑似死撐鎖車合理之餘，但對於例如河畔花園一帶想搵個位食個飯都有啲難，就只會啞忍；或是新城市廣場停車場大排長龍搞到嚴重擠塞，啞忍之外，更可能响担杆莆街排隊阻住巴士、小巴出入站係理所當然，在另一個方向的 「死撐」，就是簽文第四句。其實簡單嚟講只係四個字 ─ 逆天而行。引伸出跟住嗰四個字係乜，就係車公對沙田友嘅訓誡。若要直接啲嘅講法就係 ─ 你哋有咁耐風流，有準備 「有咁耐折墮」 嘅心理準備未？
請記住簽文所喻唔會係單一目標，幾唔鍾意劉二世、莫錦貴都好，佢哋縱不足以代表全香港市民或沙田居民，但車公 「講嘢」 唔係只會講俾佢兩條茂利 (AND 佢啲上級) 聽，係講俾全香港人聽。更是還原基本步去講，對於宗教、神明，唔好用人嘅有限去看待佢哋嘅無限。
Be the first to comment