應該係香港史上最短命嘅法例，理論上以至實務角度應該翻身無望，當然不排除由治入興之下 「強勢回歸」 然後 「強力執行」 。呢場 「亂象」 點解會發生，雖然都有人分析，只不過欠奉包含技術元素嘅分析。而呢啲專業嘅嘢，又似乎容我囂張一啲，應該得我講得到。 先此聲明，無內幕嘢，真係無內幕嘢，但就是純技術同實務角度，已經睇到好多嘢出嚟，而且可謂相當荒謬。
1 政客、官員盲目迷信 「安全帶是萬能的」 呢個迷信
田北辰真係可以話係始作俑者，但佢唔係唯一。例如易志明、劉健儀都相當之迷信，只不過易志明本身係交通行業中人，劉健儀亦同交通行業有悠久、密切嘅聯繫，「迷信」 程度未去到田北辰嗰種可謂 「瘋狂」 咁解。
至於官場，嗰班大家响電視、報紙見慣見熟嘅高級公務員，恕坦白，佢哋一來其實乜都唔識，响技術方面嘅事只係任由班工程師系嘅下屬 「舞」，二來從來只係抱住 「唔好孭鑊」 嘅心態返工，睇住輿論風向做嘢嘅唧。當例如田北辰、盧覺強、李耀培之流有乜巴士小巴意外就出嚟鳩噏大吹 「安全帶是萬能的」，佢哋嘅意識就只會跟住做嘢。可以話係成個亂局嘅遠因。
2 滿腦子以為道路安全只需用數字加諸安全帶 (相關設備) 就可以解決
大家有無發覺，每一次涉及巴士 (及小巴) 嘅交通意外，傳媒總會搵啲磚家出嚟亂噏廿四，例如俾我打到仆晒街嘅盧覺強，仲有前幾日俾人打到瞓低嘅李耀培，當然唔少得田北辰，講嚟講去都係三個方向 ─ 收緊車速限制，提高違例罰則加強阻嚇，裝多啲 「安全設備」。小巴嘅安全帶同 「三寶」 ─ 限速器、黑盒、車速顯示器，以至連埋最新嘅安全帶警報系統嘅 「小巴四寶」 就係咁樣出嚟。
但正如我响 HK Bus Channel 節目講過 「一宗意外嘅成因有好多，唔係單純車速而引致」。可是就係成因複雜，但啲記者一來懶過閪，二來根本唔識，於是做訪問問嚟問去都只係識得問一啲 Visible, Tangible 嘅嘢。久而久之，除咗班官，就連坊間都好似被洗腦咁認為做晒呢啲嘢就得㗎喇，變相做咗 「催化劑」。亦因而可以視為第二個遠因。
3 小農奴隸基因握有權力只圖隻手遮天
班立法會議員公然話無需做咨詢只係 「病徵」，真正嘅問題係佢哋嘅思維同心態。佢哋 (可能嘅) 諗法除咗揣摩上意，認為一切法案直接通過就能撈取主子歡心嘅擦鞋仔心態之外，仲有係認為無晒啲 「反中亂港份子」 就可以總督香煙廣告 「想做就去做」。
仲有諗住延伸自前面兩點，認為只要拎 「安全」 兩個字就可以輕易地壓倒一切 「反對聲音」。簡單而通俗啲講 「當市民無道」。只不過呢類涉及市民日常生活，兼且包含極高 「應用技術元素」 (Application technical factors) 嘅法例同政策，往往就係 「出事」 嘅關鍵。只不過佢哋小農奴隸基因嘅階級觀念，認定一般市民必須聽命於政府 (or 議員)，一切可以四個大字關人撚事。
4 當市民白痴
除咗拎住 「安全」 二字以為可以壓倒一切之外，仲有以為 「由治入興」 之下即使講幾多個大話都無人夠膽反駁。可是如今唔係七十年前毛澤東大叫要超英趕美時嘅資訊封閉嘅年代，啲議員、官員好一句 「外國都係要搭巴士要戴安全帶」 以為無人識穿，豈料唔計小弟响 FB、Threads 嘅連環爆料 「外國例子」，單係為數相當居於英國嘅港人蜂擁而出 「有圖有真相」 當地巴士係連安全帶都無裝，已經踢爆晒啲謊言。留意吓啲議員同官員，就算要做反駁隊都唔敢講實邊一個國家，就算夠膽講嘅，都唔敢指明英國。
加諸於小弟响一眾外國嘅朋友、網友提供相片、影片，尤其是新加坡，與及中国嘅資料，死雞點都係撐唔到飯蓋。
5 草擬條文亂鳩咁嚟
唔係特登要打粗口字，而係睇返江玉歡 「爆 seed」 之後各路人馬做嘅法律技術分析，英文版本其實還算勉強可以過骨，但中文條文就出晒事。呢個唔知係咪一個流傳咗好耐嘅 「笑話」 ─ 但凡法例中文版本都唔係金鐘返工嘅人寫。
但無論邊個 draft 都好，某程度上都係去返前面四個 Points。 事到如今，「尊貴的」 特首話必須立即解決令到法例生效云云，實際上得唔得就另文探討。只不過正如小弟日前個POST 或曾俊華今日出嘅 POST 所講，根本單係法例蘊含嘅技術元素，只要有搭開巴士嘅都必定 be alerted。只不過班議員同班官員喇喎，講多都無謂啦。
Be the first to comment