城巴壞安全帶解唔到扣乘客被困事件，相當之可疑

強制搭巴士戴安全帶法例生效之後，接二連三出事。在生效前包括小弟在內好多人嘅烏鴉口之一「壞帶that 解唔到扣」終於發生。今早一部城巴795X巴士响長沙灣運動場，一名乘客欲落車但解唔到安全帶被困，卒之要由消防員到場解困，但由於被困逾45分鐘而車上無冷氣感到不適，救出後要送院治理。

本來收到消息之後嘅第一反應係「陳百祥.JPG – 呢鑊你仲唔冚家鏟」as 烏鴉口中咗。但輾轉一日，睇過晒啲新聞，發覺多處唔尋常，尤其是城巴公佈安全帶扣入面有錫紙，懷疑有人搞破壞，就惹起我疑心。係咪又想重演某啲陰謀戲碼而自編自導自演呢？

不過咁，撇除一切陰謀論，純粹技術分析。一個完好嘅安全帶扣如有有人攝咗錫紙或紙張之類嘅入去，理論上唔係解唔到，而係插唔實。只不過如果夾硬插入去，確係有可能會出現呢個場面。

只不過係人都知錫紙係一樣極度之容易破爛嘅物品，道理上如果真係夾硬插個安全帶梢入去，應該捅穿張錫紙。所以我唔會認定張錫紙係「元兇」。再者，安全帶扣本身可以話係「消耗品」，真係「插得多又掹得多會好容易爛」，呢個亦係N年前我兜口兜面屌爆田北辰「唔好安全帶是萬能的」上腦嘅原因之一。

第二，消防員到場後用咗接近45分鐘先至响無剪斷安全帶、或拆走安全帶扣嘅情況下將該名乘客救出，耗用嘅時間實在長得有啲過份。根據接近消防專業人士方面提供嘅資訊，呢類 CASE 通常一係剪帶，一係就用汽車修理行頭俗稱「拎梗」或「嘞嘞扑」嘅工具，拆開安全帶扣連接座椅架嘅鏍絲。而無論邊一樣方法都好，耗時都唔會超過五分鐘。

另一方面，剪帶算係破壞咗巴士上嘅設備，但拆鏍絲係可以馬上還原，巴士唔需要返廠維修。好吧，點解消防無採取呢種方法迅速救人呢？

第三，乘客稱被困及等候消防員拯救期間，巴士熄咗冷氣 (即係應該熄咗車)。咁就要問返城巴，當車上還有乘客而巴士機械運作如常的話，唔係應該維持引擎運轉並帶動冷氣機組運作嘅咩？點解要熄咗冷氣甚至熄咗部車？係唔係要製造一個「乘客出大問題」嘅場景出嚟，俾傳媒「做大隻故仔」呢？

第四，同樣來自接近消防專業人士方面提供嘅資訊，巴士停低嘅地點，剛好是長沙灣消防局同荔枝角消防局「出勤範圍」嘅界線。而呢啲「細雞嘢」理論上只需出動一部「細搶」與及一部救護車，加埋唔駛十名救援人員，並且在預計不多於20分鐘內 Mission Complete。但今次事件，兩間消防局均同時出動，合共派出三部消防車，一部救護車，與及一部快速應變電單車，合共20人，搞到以為一級定二級火咁大陣仗。但就咁多部救援車响現場，傳媒就可以影到「好大陣仗」嘅畫面。唔知係咪又係要製造一個「乘客出大問題」嘅場景出嚟，俾傳媒「做大隻故仔」嘅手法呢？

另外，純粹循駕駛角度去理解，長沙灣局去現場一定快過荔枝角局過去。消防處其實係咪應該藉此機會檢討一吓出動嘅機制？

第五，成件事「詭異中之XO」之處，所有「第一手資訊」係CCTVB 東張西望放出嚟。而上星期，東張西望係咁出片極度 HARDSELL 「戴安全帶好容易、好方便」(爭在未講埋「好舒服」)。而如今就呢條「實踐偉大的領袖毛澤東主席的「超英趕美」目標，實施全地球、全宇宙、全銀河系首創兼唯一嘅法例」民間反響點樣都唔駛我再多講嘅情況，而官府幹部嘅反應繼續有如DEAD CHICKEN PUSH RICE COOKER COVER….. 加諸於「東張西望」呢四個字，好抱歉，我無辦法放低陰謀論。

但亦再撇除所有陰謀論，單純第一至第四點，係咪值得懷疑，留白俾各位還有腦袋並且會好好運用嘅香港市民。