Chiikawa 香港展覽用飲茶點心做主題可能有得解

不經不覺 Chiikawa 香港展覽進入尾聲，據主辦單位於週前嘅記招公佈售出門票以十萬計，雖然展覽模式同年初响高雄嘅唔同，無法單純以人數去做比較，但都算相當成功 (起碼勁過「熊貓經濟」先啦)。我亦有買飛去睇。雖然室內展館嘅佈置，特別係燈光嘅問題，影相好難影得靚，但總算過足癮。

推出嘅精品，其中以「飲茶點心」為主題嘅公仔掛飾，受到唔少追捧，更是從各社交網站見到有來自台灣、日本掃貨之餘，仲有拎到去中式酒樓「玩」，證明呢套公仔嘅成功所在。

雖然「飲茶點心」同八個角色表面上有啲風馬牛不相及，彷彿主辦機構同支持嘅旅發局也許只是基於香港特式而提出，但其實唔係無得解。除咗「茶樓點心」確係香港特式之外，仲可能同日本人對香港嘅追捧有啲關連。

在講落去之前「先小人」，唔好又話我鳩噏。你睇唔到、睇唔明嘅嘢，唔代表唔存在。我只係將一啲經歷、觀察同見解打字出嚟分享咁解。

回正題。曾幾何時，日本係香港入境旅遊嘅重點市場之一。旅行社除咗接團之外，仲有為日本當地嘅合作旅行社接收代訂酒店安排。當時有啲酒店同旅行社簽約訂好價錢，有啲酒店想做多啲日本客生意的話，就會零零舍舍有一項 “Japanese Market” ，而價錢有異於其他國籍，可能會稍為平少少，亦會有貴啲啲，總之自由市場，各施各法。

啲專門接日本客嘅旅行社買旅遊巴亦比較捨得買貴啲嘅車，例如1970至80年代初，啲旅行社/旅遊巴公司通常買嘅 Nissan Diesel 4R95、RM80，「名鉄觀光」就買高級啲嘅 RA50；

或是進入1990年代，例如東洋、星港、JTB等就斥巨資購置車價比當時普遍嘅「UD 大實力」RP80 貴四成嘅車款，例如三菱 MS7 系列、西德卡士寶萊 S210H。

日本人點解咁鍾情嚟香港有好多因素，但唔花篇幅去講。總之响2000年之前，「日本仔」撐起香港旅遊業「半邊天」。而响實務上，日本客比「鬼佬客」亦有少少唔同。一般响行內叫做 Island Tour，「鬼佬客」通常係 0800 – 0830 meet at lobby pick up，但日本客會係 0700 – 0715 左右。提早一個多鐘頭做乜？就係去飲茶！

响我入行揸旅遊巴時都仲有載過日本團，有去過嘅酒樓會係尖東半島中心嘅「德興」。記得有老行尊講，以前仲有去寶勒巷 (唔記得酒樓名稱，只記得係萬事昌廣場)同其他尖沙咀區嘅酒樓。到差唔多0845 – 0900 食飽先至再上返車出發去文武廟、太平山….

當然，呢啲「歷史」唔係必定解釋得到套公仔嘅來由，但正如前段所述，有日本遊客睇完展覽之後拎住套公仔去酒樓飲茶同「玩」(同啲點心影相之餘，仲有叫侍應好似上菜咁捧住籠公仔埋枱拍片)，該可引證呢啲旅遊業歷史有關連嘅可能性係存在。

後記：
1. 曾幾何時，我多番向旅發局臧明華、周梁、田大少質問「旅遊業係咪只得中国市場，其他市場例如日本、歐美鬼佬係咪唔可以嚟香港旅遊」係完全有根有據的開炮，絕非無的放矢的9UP
2. 亦係曾幾何時，我多番公開指出，旅遊業嘅重點係「有啲乜嘢特色一定要嚟香港先至體驗得到」。今次 Chiikawa 展覽算係一個試驗，證明我提出嘅論點嘅實在。