新加坡大選剛結束，人民行動黨依舊大勝壟斷國會 (稍後視乎時間安排作出評論)，旋即爆出四名位居要職嘅黨員曾與洗黑錢案主犯共享宴席之史，在新加坡當地引起譁言。雖然宴席早於洗黑錢案破案，但涉事嘅衛生部長王乙康及交通部長徐芳達亦急於發表聲明「本身唔識佢，純粹朋友約埋一齊食餐飯」。至於可謂盲信PAP嘅新加坡人都為之不滿。不過，更「好玩」嘅事，身在香港，若非「歐洲動態 – 國際 」响 Facebook page 出 post，恐怕都唔會知道有單咁嘅新聞。
簡單講呢餐飯局。據報係响2020年武肺爆法之前，新加坡食品廠商「第一家」老闆魏成輝做東請客，同場賓客包括2023年破案、新加坡史上最大宗洗黑錢案「福建幫30億坡元洗黑錢案」主犯之一蘇海金，PAP 的除咗王、徐，仲有內閣部長林瑞生，新加坡唯一工會NTUC秘書長黃志明。相片係革新黨 (Reform Party) 前主席楊耀輝 (Charles Yeo)响 IG 出 post 而流出。
我睇咗啲料之後嘅第一反應係不禁質疑新加坡人嘅政治智慧係咪仲差過台灣嘅「白藍粉」，事關前年已經爆出外交部長維文 (Vivian Balakrishnan) 同內政部長尚穆根(K Shanmugam) 非法侵佔官地起屋嘅醜聞但兩人依然當選 (維文更是响醜聞所在地荷蘭村-武吉知馬選區高票當選)；第二係 PAP 立黨根基就係清廉，涉貪涉黑都係「斬頭級」禁忌，認為PAP 唔止只顧「食李光耀老本」仲要有如中國國民黨丟掉「蔣公遺訓」咁變質。對於PAP 我已經係無眼睇。
另外，當我想睇返新加坡當地嘅報導嘅時候，發現一個近乎不能接受嘅情況。當 Google search 搵到新加坡《聯合早報》嘅相關內容，click link 出現嘅畫面係咁
睇返網址欄，對比返 Google search 結果，網址少咗 .sg，已經心知不妙。於是乎「精神移民」去新加坡再試，整篇嘅報導就出返晒嚟
而睇返「無 .sg」嘅網站嘅底部，似乎解釋得到點解睇唔到
表面上可以理解為中国式新聞封鎖，但引伸出嚟，即係可以認為 PAP 試圖臭屎密冚？！或者該宗洗黑錢案，犯人均為 China National，甚至飯局東家的魏成輝祖籍來自福建，可能係原因。
不過，有更「抵死」嘅情況係雖然「無.sg」嘅網站底部有 click 去「.sg」嘅網站，但只要無「精神移民」留响香港，永遠都只係彈返「無.sg」我會稱為「坡縣版」。
作為曾經係《聯合早報》撰稿人，對於呢個情況真係唔知講乜好。又或者話無供稿咁多年，可能係「三生有幸」獲神明庇佑。我必須要強調，係我因為生活同工作無時間、無精神再寫，唔係某隻昆咗某人 (not me) 六位數嘅蘇門答臘生蕃幻想試圖鳩吹叫 SPH ban 咗我 (don’t barking will not publish even if I have time to write) 。而今次呢單嘢，令到我更加無打算再供稿俾 SPH。
總括返呢次事件，到底 PAP 嘅金漆招牌仲捱得幾耐，客觀而言真係一個謎。不過，承如前段提及「維文、尚穆根依然當選」，似乎連新加坡人都好似將李光耀訂下嘅天條拋諸腦後。新加坡仲會唔會係1992年新加坡航空公司電視廣告，吳國敬主唱嘅主題曲嗰句「那裡會是個天堂」，恐怕要審慎觀望而不要盲信好了。
Be the first to comment