講親新加坡，總有盲毛反駁隊

承如上一篇文，香港人對新加坡有好多誤解；而N年來我每一次寫文或出片講新加坡之後，總有一定數量嘅「反駁隊」出沒，著實我都見慣而不怪。因為始終我提出關於新加坡嘅觀察同論點，尤其是涉及政治方面，對於普遍香港人嘅「認知」係好大落差。

好似一講「民主選舉」嘅事實，總係會有一堆反駁隊，提出嘅嗰啲論調，來來去去都係三幅屁，唔重覆了。但我發覺無論邊一個角度嘅反駁，都有一個共通點，就係從來只係睇香港 (或台灣) 一啲片面之詞嘅「帶有毒性」嘅所謂分析，從無認認真真去了解過新加坡。而呢一個現象其實好值得探討，或者話N年嚟我都好想做嘅嘢。但目的唔係去 proof 我講嘅嘢有幾堅，而係理想啲講欲撥亂反正，或實際啲講係 showing 香港人有幾咁無知。

一直以嚟，响香港能夠睇得到關於新加坡嘅資訊真係好有限，响社會角度只係得「公屋好靚好大間又價錢好平」，花園城市街道好乾淨；或是响吃喝玩樂方面就只得某幾個遊客區嘅 Hawker Centre 嘅嘢食、商場，聖淘沙島，以為禁售可口可樂、香口膠；政治上更局限於由「李光耀專制獨裁可恥」所延伸出嚟嘅觀點以至批評等等。

問題嚟喇，當出現一啲 other than usual received 嘅資訊，以香港人經年累月嘅習性，必定係抗拒咗先，更是近年出現嘅「黃洋達之有理無理梗係屌咗先」嘅網絡氛圍，更加之可能一言九頂。

再細心一啲去分析，呢啲反駁隊，對於新加坡嘅狀態唔止一知誤解，更是對好多必定有關連嘅歷史因素原全毫不知曉，於是乎一切反駁根本係笑料。

例如最新响我嘅 Threads 有人指「廣泛誹謗罪」嘅控告就是李光耀打壓言論自由可恥。嗱，坦白，我從不否定李光耀有濫用告誹謗嘅問題，但掉返轉，如果唔係衰多口，李光耀何來「有位入」呢。我其中舉出响香港電台「傑出華人系列 – 李光耀」有訪問到嘅鄧亮洪作例。心諗以為呢件反駁隊仲會引述一吓當年鄧亮洪嘅受訪內容添，點知條友原來直情唔柒知新加坡近代史上有一個叫鄧亮洪嘅人。

更好笑嘅係，過去唔少香港政客以作高喊「打壓言論自由新聞自由鐵證」祭出嘅1971年華文報禁事件，條友同樣都係完全唔知。加上發爛咋爆粗兼人身攻擊，於是就BLOCK9 咗佢。

的而且確，1971年華文報禁事件係極具爭議，但箇中關於種族衝突嘅歷史因素，就成為李光耀不得不鐵腕對付當時高調以「中国未來會很強大」鼓吹提升中文法定地位嘅幾間報社。

仍然記得好多年前响一個公開場合同一位有响2000年李光耀出席中文大學頒授榮譽博士學位時有响現場示威抗議嘅前議員講開呢件事，佢當然繼續講「李光耀打壓言論自由可恥」啦，但我話「如果李光耀就範，跟住就必定係馬拉佬、印度佬又出嚟嘈，再甚至極有可能重演1964年7月21日暴亂嘅歷史以至種族衝突無日無之，到時新加坡變成有如中東火藥庫咁，點算先？唔好話你仲有無本事管落去，李光耀都唔知點算」佢當堂為之語塞，而我就跟住一句「喂阿哥，拎飛煙嚟燒吓先啦」打圓場，佢即刻遞包煙出嚟俾我，然後大家笑笑轉話題。

相信大家睇到呢一點，應該會同意我一直以嚟指對新加坡 (與及馬來西亞) 嘅政治 is very very complicated and should not ignore historic factors 去做觀察分析。而呢一樣嘢，正正係過去最少十幾年嚟，幾乎所有香港嘅評論人都欠奉的。

再引伸出嚟，係唔係唔可以批評李光耀、PAP，答案當然唔係。只不過要必須具備真憑實據，而且要掌握一啲技巧，然後可以「屌到爆廠」都無問題，不然我又如何可以多次响《聯合早報》撰文炮轟某啲當地政策呢? 再甚至乎，2013年發生過一場多達5000人嘅示威，抗議當年新加坡政府發表嘅「人口政策白皮書」?? 或者再問返香港人，你哋有邊個仲記得呢一場示威呢？

其實香港人觀察外國社會嘅態度同方法 ─ 坐井觀天+以香港為中心，係最大嘅問題。若果有實在的去睇例如新加坡當地嘅資訊，又點會有呢啲on9的反駁出現吖?! 

我唔係要樹立啲乜嘢「論述權威」，我從來都只係將一啲我睇到、了解到嘅嘢，攤晒出嚟俾大家睇。大家受定唔受 none of my business。只不過話，攤晒出嚟而仲要繼續用錯誤嘅嘢嚟反駁，唔好話我會否 Block9u，真係顯得你嘅無知囉。