的士牌價補遺 – 拜鐵路教與N線巴士

前篇文章一出，確係開始引起討論，在我的 FB 有留言指「拜鐵路教」同通宵巴士線嘅增加，都係的士客量流失，導致的士司機收入下跌嘅因由。我再翻查資料，確有的士業中人對傳媒提過呢兩樣嘢對的士客量嘅影響。咁就補充返呢兩個方面嘅分析。

「拜鐵路教」何解可以睇返我响 HK Bus Channel 《盲信鐵路萬能俠，失去智慧的開端》嘅一篇文章。綜合而言，係指市民使用公共交通嘅習慣對港鐵極度依賴甚至奉若神明。而促成呢種現象嘅成因之一，就係政府在港鐵新線通車前後大幅削減巴士服務。另外，道路擠塞亦使市民認為「搭鐵唔會塞車」而偏向乘搭港鐵，甚至放棄巴士；再甚至乎，每逢有涉及巴士嘅交通意外，傳媒總會搵嚟理工大學機械工程系前教授盧覺強亂噏廿四 (e.g.玻璃纖維猶如紙扎) 煽動公眾對巴士產生恐懼，令市民有意無意地產生抗拒巴士嘅意識。

「拜鐵路教」表面上因為收費嘅差距，理論上對的士係無影響，但塞車呢樣嘢的「公平」之處在於巴士、的士，以至所有汽車，都係受到影響的。影響之其一係各項基建工程，例如有網友提到高鐵西九站興建期間，佐敦一帶塞到阿媽都唔認得，坐响架的士上面睇住咪錶係咁跳，然後啲時間咁就浪費晒，然後就爆seed一句「早知去搭地鐵仲快趣」。

其二係例如 2014年港島線西延線通車，過去往返西環、堅尼地城至中上環都好大可能焗住要塞上環信德至林士街之間嘅干諾道中、德輔道中，港鐵通車成就咗「搭鐵唔會塞車」嘅聖訓。跟住仲有 2016年觀塘線延至黃埔，除咗捷輝小巴受到影響，的士亦因為「搭鐵唔駛塞」柯士甸道、近太空館一段梳士巴利道，而少咗呢班客。

講開捷輝小巴，順便講一個沒有公眾知情嘅故事。話說捷輝謝老闆曾經聘請顧問公司做客量調查，發現傍晚繁忙時間6號線往黃埔花園方向於柯士甸道嘅兩個站 (吳松街口，德信學校)，都有乘客因為等候太耐而轉乘的士，每日涉及嘅人數逾20人。謝生收到數據及與主管們討論評估過對漢口道總站嘅影響之後，訂出「6 黃埔花園 – 中港城特別車」，加快車輛流轉至柯士甸道撈返呢批客返嚟。不過，依家講乜都無用啦 _{(寫出嚟就係俾大家睇吓黃埔花園啲19中產係幾咁折墮)}

年份	港鐵新增路線	的士每日乘客人次	公共交通每日總人次（萬）
2012	—	約 800,000	約 1,210
2013	—	約 780,000	約 1,240
2014	西港島線	約 750,000	約 1,250
2015	—	約 720,000	約 1,260
2016	南港島線	約 700,000	約 1,260
2017	—	約 690,000	約 1,270
2018	高鐵香港段	約 680,000	約 1,290

正所謂數字說明一切。雖然2014年打後嘅的士客量變化仲要「入 UBER 數」，但 UBER 無可能搶走兩三萬客吧。

至於通宵巴士，亦可謂另外的致命一刀。事關回望通宵巴士線寥寥無幾之時空，深宵時份的公共交通就只得紅VAN同的士。及至1980年代中期，隨住港人開始熱衷於夜生活，即使運輸署批准開辦通宵專線小巴61S 旺角-沙田禾輋 (1984年)，及 47S 旺角-屯門碼頭 (1986年)，由於班次疏落得動輒候車逾一小時，的士仍然肩負深宵公共交通嘅重任。但隨住香港人「越嚟越夜瞓」，深宵交通需求陸續增加，專利巴士公司管理層認為「反正都要開員工班車，不如將之變為載客服務，順便增加車資收入」，於是乎由241S、293S 開始，深夜至凌晨嘅公共交通服務選擇漸多，的士開始受到真正嘅衝擊。睇返 2008 – 2018年呢11年嘅通宵巴士線數目嘅增長，的士根本早已陷入危機。

年份	九巴（KMB）	龍運（LWB）	城巴（CTB）	新巴（NWFB）
2008	18	2	12	10
2009	19	2	13	10
2010	20	2	13	11
2011	21	2	14	11
2012	22	3	14	12
2013	23	3	15	12
2014	24	3	15	13
2015	25	3	16	13
2016	26	3	16	14
2017	27	3	17	14
2018	28	3	17	15

由此可見，的士根本早就需要尋求轉型，而我响2015年立法會公共交通策略研究專題關於的士提交嘅意見書入面，亦已經提多幾個可能嘅轉型出路，但的士業界 (尤指車主) 徹頭徹尾只係一堆尋租嘅撚樣，唔好話只會嗤之以鼻，當中提到嘅「無障礙運輸」，除咗泰和車行嘅伍海山用行動撐起「鑽的」，與及後來也圖對殘疾人士市場分一杯羹嘅忠誠車行嘅鄭敏怡之外，全個行業不單矢言歧視的「跛嘅就咪撚出街啦」認定是多餘，甚至恥笑鑽的 DORIS 做埋啲無謂嘢，與及埋怨伍、鄭「搞亂晒成個行頭」。除此之外，「尾冚閂唔埋」講咗咁多年都唔當一回事，只會認為福特 Transit 啲租收平幾十蚊唔慌唔蝕。如今回看，的士業界由惹起民怨到牌價急挫，一切根本完全係自招的。

或是再延伸出嚟去講，的士行業嘅衰落，根本就係其中一個香港社會縮影。即係點？有幾多香港人唔想「瞓响度有錢搵」？有幾多香港人唔係滿腦子「著數想要，代價責任卸俾人」???