台灣嘅「大罷免」進入最後大直路，嚟緊嘅星期六就有24個罷免國民黨立委 (加1個民眾黨新竹市長高虹安) 議案進行投票。據上週五嘅「封關民調」顯示，選情呈膠著狀態，好難作出預測。另外仲有7個罷免議案會响8月23日投票。
國民黨對於整場大罷免嘅態度由始至終都係話民進黨獨裁批鬥，每一場有關嘅活動，政客黨員每一次扑咪受訪，都係同一個調子。即使一班被稱為「正藍派」以至元老級黨員出嚟批評老K們嘅所作所為，甚至明言支持大罷免呼籲選民聯署、投票「同意」，上至朱立倫、韓國瑜、趙少康，下至凌濤、詹為元、呂家愷，對住鏡頭唔係「反綠共」就係「民進黨打輸翻桌」，從來都否定公民社會動員嘅存在，更當然唔會認為自己做嘅嘢有錯啦。
其實由大罷免收集動議聯署開始，即係今年1月中旬左右，已經有風聲指藍營入面有人認同、支持罷免，甚至暗中協助罷免團體收集聯署，涉及嘅有老K黨內唔同階層，由一般黨員到里長等。甚至更高階層的政客，例如其中最甚囂塵上嘅台北市松山信義區嘅前立委費鴻泰。或是已退黨但仍算藍營嘅花蓮縣議會議長張峻、花蓮市長魏嘉賢家族(張峻已經公開表態；費鴻泰同魏氏家族仍潛水當中)。 另外有傳幾個若罷免通過之後嘅補選會爭取參選的人物，例如論政節目常客嘅李明賢、凌濤、呂家愷等等。
呢幾個台灣民間稱作「背骨仔」嘅疑似藍營二五，說穿了當然因為個人利益，例如費鴻泰在前年黨內初選被徐巧芯擊敗；張峻、魏氏家族與傅崐萁長期積怨；李、凌、呂等則因為論資排輩、人脈關係、元老佔據議席而遲遲未能上位。可見大罷免還存在藍營派系內鬥嘅情況。
香港裔嘅評論人、學者對台灣政治嘅觀察，悠久以來普遍地深受老K嘅觀念、價值觀影響，思路都係沿襲國民黨嘅嗰一種，即使唔係親藍都必定仇綠。莫講2000年陳水扁勝選咁遙遠，打從2016年嘅觀察好多都係錯嘅，或者唔知講乜嘢好。而今次大罷免，同樣有呢啲錯誤情況，亦巧合地都係話大罷免係由賴清德所策動，或最起碼認定民進黨先至係真正主謀、幕後黑手、總指揮，尤其是聯電創辦人曹興誠宣佈擔任罷免徐巧芯嘅領銜人開始，呢啲講法响港裔評論圈子中彷彿成為主流。
也許因為大罷免由蘊釀期開始，走出嚟嘅都係「悉尼老鼠」(普通民眾、路人甲)，對於港裔評論人而言完全唔符合過去佢哋認知嘅「社運模式」，太習慣見到「大台」，甚至想或已成為「大台」嘅話事人，因而意識上排拒「由下而上」嘅公民運動策動模式，然後不斷試圖去搵「大台領袖」，但搵極搵唔到於是乎祭出幾十年嚟沿自老K嘅嗰啲觀念、諗法，然後就跟隨朱立倫嗰一套「乜都係大獨裁者賴清德搞出嚟」。
另一個可能嘅情況就係佢哋根本無仔細睇、甚至無睇台灣嘅新聞資訊。如果有仔細少少睇，見到啲罷團擺檔地點嘅社區其實係「藍到出汁」(當係北角春秧街 vs 禮義廉咁樣理解) 竟然大排長龍，而且人龍當中普遍係長者，理應都唔好再諗住係乜嘢藍綠對決吧。
再到4月中旬嘅「二階聯署」展開，更多知名嘅「正藍派」走到台前，例如徐柏岳、丘衛邦，加諸於早已「背叛國民黨」嘅黃澎孝、于北辰，大致可以確定「正藍派」於大罷免嘅取態走向。再甚至如下面兩張相片嘅外牆廣告，要套用香港去比喻去理解，即有响春秧街、錦屏街掛出嚟叫禮義廉、工賊會嘅議員收皮。港裔評論也許因無辦法將「老K價值觀」fit in 去觀察，不再對台灣情況說三道四，唔係怕俾人鬧，係整理唔到啲所謂論述去講或寫。亦當然有某啲「教主」繼續餵養信眾吧。
如今去到投票前夕，除咗封關民調反映情況之外，似乎連台灣當地嘅學者、名嘴都可能未完全突破「傳統藍綠對決」嘅框框內。事實上，從各類動員活動場面都充斥住「正藍派」群眾，根本真的不再是藍綠對決，或是藍營 vs 公民組織+綠營嘅對決，因為既然封關民調「同意罷免」嘅投票意願已逾八成，即係傳統稱為泛綠陣營嘅動員力量已經出盡，理論上「25% 門檻」應該可達，剩低嘅變數就在於藍營方面，即如名嘴們的「二十五趴加一」。
如今藍營已可大致畫分為「親共」與「反共」兩派，前者如今被稱為「紅派」，後者即為「正藍派」。正藍派預計將投下同意罷免票，按此局面去睇，7月26日嘅真正對決，係老K「紅派」vs 「正藍派」。亦即係話罷免陣營响最後幾日嘅動員目標是正藍派。
最後，奉勸香港人，無論係普通人還是所謂評論人，要觀察、了解台灣嘅政局，搣甩晒老K價值觀嘅毒素先吧，否則只會一直錯落去，直到永遠。阿門。
Be the first to comment